آدولف هیتلر (وه دی اومایٱ د ۲۰ آوریلٛ ۱۸۸۹ – د دۏنیا رتٱ د ۳۰ آوریلٛ ۱۹۴۵) دیووندار کاریزماتیک پارتی سوسیالیست زایاراٛیی کارگرؽا آلمان (پارتی نازی) بی. و مؽنجا سالؽا ۱۹۳۳ تا ۱۹۴۵ صدراعظم آلمان ۉ د ۱۹۳۴ و اۊلٛا، هوم گات وا و وا داسوݩ گیرینج نوئادؽارکوݩ رایش آلمان گٱپ حکومت مؽکرد. هیتلر وا داسوݩ یاٛ سرواز کونٱکار د جنڳ جهونی ٱول ٱندوم پارتی نازی بی، وه د سال ۱۹۲۱ بی و دیووندار اؽ پارتی. وه د سال ۱۹۲۳ سی یٱ کاْ ٱندوم یاٛ کۊدتا ناخوش سرٱنجوم کاْ وا نوم «کۊدتا آوجۉفرۊشی مۊنیخ» نومدؽار بیٱ محکۊم بی و د سرگوئارٱنن ۵ سال زندوݩ ۉ د اؽ گات بی کاْ وه کتاو جٱنڳ کاری ماْ ناْ نیسٱن. هیتلر نوئا د آزاد بیئن د زندوݩ، وا دٱرتیج کاری ویر ۉ باورؽا ویرا زایاراٛیی، زیک کومونیستی، جنڳ وا جیدؽا ۉ هچایٱکاریا نازار د تیشک پاٛموݩ ورسای، آئمؽا فراٛ ناْ د ولات آلمان لٛادرا خوش کرد. هیتلر د سال ۱۹۳۳ زارۊیی بی و صدراعظم ولات آلمان. کوملۊس ٱرتشی-سنا ولات آلمان د گات دیوونداری و تونس آز د دٱس رتٱ ولات آلمان ناْ د نۊ زنٱ بکٱ ۉ ولات بکٱ یٱکؽ د ولاتؽا قوین هومبٱست اورۊپا د او گات. هیتلر سؽاسٱت جارجی خوشاْ وا دال سؽاست لبنسراوم نوئاداری کرد ۉ یکؽ د دلٛیلٛؽا ٱسلی ۉ نازار پؽش اومایئن جنڳ جهونی دۏئم چۊل کاری د ولات لٛهسوݩ د سال ۱۹۳۹ بی کاْ د کارگرایی چنی کنشکاری بی، کاْ ولاتؽا بریتانیا ۉ فرانسٱ اومایئن ری وری ولات آلمان. د کارگرایی چنی کاری بی کاْ مؽنجا دۏتا د جرغٱیا آزؽا ری و ری یکاگرتٱیا ۉ آزؽا یکاگرتٱ جنڳ بی ۉ د اؽ گات بی کاْ هومبٱست اورۊپا ۉ همچنی جایا فراٛیؽ د سرتاسر دۏنیا تیٱدؽار جنڳ ۉ تلفات فراٛیؽ بی. ٱرچاْ د گات ساٛ سال، آلمان ۉ آزؽا یکاگرتٱ وا وه بؽشتر راساگٱیا اورۊپا، بٱئرجا فرٱ گپؽ د هومبٱست اْفریقا، ٱفتاونشیݩ آسیا ۉ هومبٱست جهوݩ آو ناْ گرتن نیرۊیا ری و ری یکاگرتٱیا د سال ۱۹۴۲ و نوئا، د ونو اومایئن وا پؽش ۉ د سال ۱۹۴۵، رایش آلمان گپ ناْ د چار قر گرتن.
هیتلر د رۊز ۲۹ آوریلٛ ۱۹۴۵ د رۊزؽا آخر جنڳ برلین اْوا براون ناْ کاْ سی سالؽا فرٱیی معشۊقش بی و زنی هاس ۉ یاٛ رۊز نوئاتر د اؽ اتفاق یٱنؽ د رۊز ۳۰ آوریلٛ، وا هومسرش خودکشی کرد.
آدولف هیتلر نزیک سائٱت ۰۶:۳۰ اؽوارٱ رۊز ۲۰ آوریلٛ ۱۸۸۹ د یاٛ موسافرهونٱ د یاٛ شٱئر مرزی ۉ کوچک وا نوم بران آئو اْم آین د ولات اوتریش، کاْ مؽنجا مرز دۏ ولات اوتریش ۉ آلمان آلمان بی اوما و دی. بوئٱ هیتلر آلویس هیتلر (و دی اومایٱ د سال ۱۸۳۷ –د دۏنیا رتٱ د سال ۱۹۰۳)، یاٛ کارمن گیرینج هار گمرک بی. دا هیتلر، کلارا هیتلر (و دیر اومایٱ د شٱئر پۊلزئل)، دۏئمی میمزا آلویس بی. وه شش تا بچٱ زایی ۉ تنڳؽا آدولف کاْ دۏئمی بچٱش بی خوئٱر کوچکش پاولا د گات بچاٛیی زنٱ منن. د گاتی کاْ هیتلر سی سالٱ بی هونوادٱش کوچ کردن سی ولاتچٱ باواریا کاْ ها د هارگٱ ولات آلمان. د سال ۱۸۹۴ هونوادٱ هیتلر رٱتن سی شٱئر لینز ۉ تا گات بازنشسٱ بیئن بوئٱ هیتلر د اۊچاْ مٱنن، د اؽ گات هیتلر چی یاٛ بچٱ ناشکٱت مشغۊل بازی ۉ آمۊختارکاری د یاٛ آمۊختارجا نزیک هونشوݩ بی. برار و اْدموند د کارگرایی مرض سۊرژگٱ د ۲ فوریٱ ۱۹۰۰ د دۏنیا رٱت ۉ اؽ اتفاق یاٛ کارگرایی دایمی ری هیتلر نیا ۉ باعث بی کاْ اْتماد وه نفس هیتلر فرٱ کم با ۉ وه فرٱ هٱلٛ خولق با. رابطه هیتلر وا داش فرٱ خۊ بی ولی برعسگ و رابطه ش وا بوئٱش فرٱ گن بی سی یٱ کاْ بوئٱش وه نٱ فرٱ مؽزٱ . وا یٱ کاْ هیتلر فرٱ مؽهاس آمۊختارکار رشتٱ هونر با ولی بوئٱش وه نٱ کلٛ مؽکرد سی مدرسه فنی، هیتلر د نوئاتر د کتاو خوش یعنؽ کتاو جنڳ کاری ماْ گوت کاْ «تمارزی دارم کاْ بتونم چن سا وا دما رٱتنی کاْ بوئٱم سیم راس کرد دۏرس بکم». هیتلر حتی د زمینٱ سؽاست وا بوئٱش فرٱ جیاوازی داشت، بوئٱ هیتلر و اْمپراتۊری اوتریش اْتقات داشت ولی هیتلر مؽگوت کاْ خود اوتریش هم ٱندوم آلمان ۉ اْمپراتۊری رۊم دمادار ٱ. نوئا د دۏنیا رٱتن بوئٱ هیتلر د رۊز ۳ ژانویٱ ۱۹۰۳ وه مدرسٱ فنی ناْ ولٛ کرد. آدولف هیتلر د کتاو جنڳ کاری ماْ، دبارٱ بوئٱش فرٱ خۊ قسٱ مؽکٱ، ولی چنی مۉئٱ کاْ تصمیم وه سی کشیار بین باعث بیٱ کاْ مؽنجا خوش ۉ بوئٱش جگایی پؽش بیا.
د سال ۱۹۰۵ و نوئا هیتلر د یاٛ پرورشگا بۊھامایی زهشت داشتٱ ۉ داش وه ناْ زؽر تیٱ خوش داشتٱ. وٱ دۏ تا د سامونگٱیا ھونٱرؽا نازار ویئن (د سال ۱۹۰۷- د سال ۱۹۰۸) سی سلادار ناٛیئن د کشیاری رٱد بی. وه وه گوتن کاْ آزکارؽا وه بؽشتر د زمینٱ ماٛماری ئٱ. وه د ویردؽارؽاش کاْ نشودؽارکوݩ دل رٱتاٛیی وه د کشیاری ۉ ماٛماری نی نیسٱنٱ: دال ماْ د اؽ سفر وارسی عسگدونی مۊزٱ کرت بی. ولی نوئا یٱ کاْ ماْ وروٱنم وا یاٛ تابلو فٱمسم کاْ یاٛ چی ھنیٱ کاْ مناْ مۉرٱ و لٛا خوش ۉ وه هم خود مۊزٱ بی. شۉسۏ تا، ویرم د یاٛ گلٛ داسوݩ میرات سی یاٛ گلٛ داسوݩ ھنی ولی اؽ ساختموݩ مۊزٱ بی کاْ ویر ماْ بؽشتر ری وٱ بی. د ۲۱ دسامر ۱۹۰۷ دا وٱ کلارا ھیتلر وا یاٛ د دۏنیا رٱتن پردرد د کارگرایی سراطون سینٱ د سن ۴۷ سالاٛیی د دۏنیا رٱت. ھیتلر و دٱس یاٛ دادگا د شٱئر لیز ھمٱ بٱر خوشاْ د اْرس بوئٱش دٱ وه خوئٱرش پاولا ھیتلر ، آدولف د سن ۲۱ سالاٛیی وارس مال یٱکؽ د میمی یاش بی. وٱ وا کسم یاٛ کشیار د شٱئر ویئن مشغۊل و کار بی. وٱ در ری کارت پوستالؽا کشیار کاری میکرد ۉ ونوناْ مؽ فروخت و ولاتگٱردؽا. تا دما جنڳ جهونی ٱول و نزیک د ۲۰۰۰ تابلو کشیاری راس کرد. ورٱز دۏئمی گلٛ اْخراج بیئن د سامونگٱ ھونرؽا نازار ھیتلر فرٱ ژار بی. د سال ۱۹۰۹ وٱ د دۏم یاٛ پٱلٛٱمار مؽگشت د سال ۱۹۱۰ وه د یاٛ هونٱ کاْ سی کارگرؽا ژار بی ایسجا بی. ری و ری کاری وا لٛوݩ جید د رزهشت کاتولیکیا اوتریش فرٱ ریشٱدار بی، ویئن یاٛ کوملۊس گٱپ جید، کاْ د ورگرتٱ جرغٱیا جیدؽا اورتودوکس فراٛیؽ د اورۊپا ٱفتاوزنوݩ بی. ھیتلر چنی اْتقات داشت کاْ جیدؽا دۏشمن لٛوݩ آریایی ۉ باعث ژار بیئن ولات وٱ یعنؽ اوتریش بیئن. د گاتؽ کاْ ھیتلر د ویئن ایسجا بی ، هال ۉ بال سؽاسی ۉ کردار پارتؽا جۊر وا جۊر نە فرٱ د ویر خوش داشت ۉ تٱفرٱ مؽکرد کردار پارتؽا ناْ وارسی بکٱ. وه نوئا د وارسی کاری پارتؽا ولات اتریش چنی نٱتیجٱ گرت کاْ تٱتڳؽا پارتؽ کاْ مؽتونٱ د ولات اوتریش قۉینتر د ھمٱ پارتؽا با بایٱد بتونٱ زایارٱ ناْ بؽارٱ د خؽابونؽا ۉ ھٱمچنی دس کم یکؽ د آزؽا ٱسلی ولات اوتریش یٱنؽ ٱرتش، کلٛیسایا آیم ٱوٱل مملکت (سرکومرٱ ولات اتریش) ناْ وا خوش داشتۊئٱ. ھیتلر د کتاو نومدؽار خوش یٱنؽ جٱنڳ کاری ماْ چنی مؽنیسٱ کاْ حرفؽا نیسموݩ شناسونٱ ۉ نازار نیسٱن کاْ ویرگار سازٱن ۉ تٱنڳؽا ھچایٱ کارؽا تٱشدار ۉ نازار ھؽسن کاْ لٛادؽارکوݩ ویرگارٱن. وه د سال 1913 د ولات اتریش-مجارسون رٱت سی مۊنیخ ولی سی یٱ کاْ و ولات اتریش نرٱتٱ بی سر خدمت، پلیس وه ناْ گرت ۉ دٱش و ولات اوتریش ولی وه وا خوش شامسی د خدمت معاف بی ۉ یاٛ گلٛ هنی ورگٱش و مۊنیخ.
د اۊت ۱۹۱۴ جنڳ جهونی ٱول شرۊ بی ۉ هیتلر سی لٛشگر باواریا داوطلب بی. وه یاٛ سرواز کنشکار بی ۉ وا داسوݩ پغامبر د ولات فرانسٱ ۉ بلژیک د تیرٱس تٱش دۏشمٱݩ بی. ٱرچاْ خدمت هیتلر وٱرتیٱگر بی ولی سی یٱ کاْ وه زایاروٱنی آلمانی ناشت گیرینجش بؽشتر د سرجۊخٱ ناٛی. وٱ دۏ گلٛ سی زٱلٱداری د جنڳ نشوݩ صلیب آهنی، گیرینج دۏ، د دسامر ۱۹۱۴، ۉ صلیب آهنی ناْ، کاْ یاٛ گلٛ گیرینج یکٱ ۉ ه نه فرٱ کم دٱنش واْ سرجۊخٱیا ، د ما اۊت ۱۹۱۸ گرت. د گات جنڳ ھیتلر یاٛ گلٛ آلمانی ولات دۊس بی، وا یٱ کاْ وه تا سال ۱۹۳۲ زایاره وٱنی آلمان ناشت. وه د گات خدمت سروازی، سی رۊزنامٱ ٱرتش نقاشی مؽکٱشی ولی د سال ۱۹۱۶ د راساگٱ پا چپ زخمدار بی ۉ سی وه نشوݩ جانبازؽا ناْ گرت ۉ دما خۊ بیئن ھنی گلٛ اوئرد و جبهٱ. د گاتؽ کاْ زایارٱ اْتقات و یٱ داشتن کاْ ٱرتش آلمان شکس نموهرٱ، آلمان د نووامر سال ۱۹۱۸ شکس هرد. هیتلر وا فٱمسن هوئال شکس هردن آلمان شوکٱ بی. وٱ د او گات سی یٱ کاْ وا گاز خردل شیمایی بی د بیمارسوݩ صحرایی بی ۉ موقتا کۊر بی یؽ. چی بؽشتر ولات دۊسؽا، وه هم مؽگوت سؽاستکاریا ناجنڳ مدار ۉ جیدؽا ۉ کومونیستؽا مقصر ٱصلی شکس هردن آلمان هؽسن.